De luaders Frühjahrsmüdigkeit

bringt mih sicher nu soweit,

dáß ih bán Essn liaber steh statt sitz.

Wurscht, wia ih mein Schädl stütz,

er rutscht már dauernd Richtung Tisch,

wo ih’n aft ausn Teller fisch!

Da lieg ih vo dá Stirn zán Kinn

in dá Fritáttnsuppm drin,

im Gulásch oder Kaiserschmarrn!

En Spott kann ih mir net dásparn.

Da hörst „Mia hättn was gegn dei Gfrett:

Bleib halt bis zán Herbst im Bett!“