Wünsch’ enk alln á guats neuchs Jahr,

besser wia des alte war!

Wann's nu geht, schick ih voraus,

weil wann's oan z' guat geht, is’ á Graus,

genau wia wann's dár drecki geht

oder gar 's Lebm in Frage steht!

So mittndrinnan wár's grad recht!

Zán Aushaltn guat und grad so schlecht,

dáss d' hie und da án Deuter kriagst:

„Páß auf, dáss d' ás net überziahgst,

á gstreßter Mensch, mei liaber Bua,

der braucht hie und da sei Ruah!“

Drum sag ih enk: Ob Frau, ob Mann,

gehts des Jahr ja schön langsam an!

Muaß net renna - geh spaziern,

muaß net z' viel toan, ih nutz mei Hirn

und denk bán Arbátn zerst nach,

wia ih's denn ám gschicktern mach!

Fallt már da nix Práktischs ei(n),

aft laß ih's momentán nu sei(n)!

Wünsch, es habts áh so viel Geduld

(falls net, aft sáts ebm selber schuld),

wünsch Gsundheit und viel Glück dázua,

alls Guate - enker Lándlbua!